‘பாரிஸ் ஜெயராஜ்’ நகைச்சுவை படம், ‘ஏ1’ புகழ் ஜான்சன் கே எழுதி இயக்கியுள்ளார். இப்படத்தில் சந்தனம் மற்றும் அனிகா சோதி, ‘மொட்ட’ ராஜேந்திரன், டைகர் தங்கதுரை, ப்ருத்வி ராஜ் மற்றும் பலர் நடித்திருக்கிறார்கள். இதை லார்க் ஸ்டுடியோஸ்-ன் கே குமார் தயாரிக்கிறார். ஆர்தர் வில்சன் ஒளிப்பதிவு செய்ய, சந்தோஷ் நாராயணன் இசையமைத்துள்ளார்.
சந்தானம் வடக்கு மெட்ராஸைச் சேர்ந்த கானா பாடகர், ஒரு பெண்ணைக் காதலிக்கிறார், ஆனால், அவரது தந்தை ப்ருத்வி ராஜ் ஒரு வழக்கறிஞர். ஒருமுறை ஒரு சிறுமியின் தந்தையிடமிருந்து பணம் பெற்ற பிறகு அவர்களது உறவை முறித்துக் கொள்கிறார் சந்தானத்தின் அப்பா. பின்னர், அனைகா சோட்டியும் சந்தானமும் காதலிக்கிறார்கள். இவர்களது காதலை பிருத்வி ராஜ் ஏற்றுக் கொண்டாரா? இல்லையா? என்பதே படத்தின் மீதிக் கதை.
’ஏ1’ படத்தைப் போலவே இப்படத்தில் சந்தானம் நடிப்பு, நகைச்சுவை, சண்டைக் காட்சிகள் அனைத்திலும் சிறப்பாக நடித்திருக்கிறார். நாயகி அனைகா சோட்டியின் நடிப்பு சொல்லிக்கொள்ளும் படி இல்லை ஆனாலும் அழகான நாயகியாக வந்து செல்கிறார். படத்தின் முதல் பாதியில் என்ன இப்படி செய்கிறார் என்று பிருத்வி ராஜ் தோன்ற வைத்தாலும், இரண்டாவது பாதியில் அவரை வைத்து நகைச்சுவையை அள்ளிக் கொட்டி இருக்கிறார்கள். படத்தின் மற்றொரு பக்க பலமாக மொட்டை ராஜேந்திரனும், லொள்ளு சபா மாறனும் பயணம் செய்திருக்கிறார்கள்.
இவர்களின் நகைச்சுவை அலப்பறையில் அரங்கமே சிரிப்பலையில் அதிருகிறது.
ஏ1 படத்தின் வெற்றி இப்படத்திலும் இயக்குனர் ஜான்சனுக்கு தொடருகிறது. சந்தோஷ் நாராயணனின் இசை படத்திற்கு பலம் சேர்த்திருக்கிறது. ஆர்தர் வில்சன் வித்தியாசமான கோணத்தில் ஒளிப்பதிவு செய்திருக்கிறார். முதல் பாதியைவிட இரண்டாம் பாதி கலகலப்பாக இருக்கிறது. நாட்டாமை படத்தில் வந்த ஒரு நகைச்சுவைக் காட்சியை வைத்து படம் முழுக்க சிரிக்க வைத்திருக்கிறார் இயக்குநர் ஜான்சன்.
பாரிஸ் ஜெயராஜ் – அனைவரையும் கலகலக்க வைக்கிறார்
