நாயகன் கிஷோர் வாடகை கார் ஓட்டி தனது குடும்பத்தை காப்பாற்றுக்கிறார். இந்நிலையில், வேலை பார்க்கும் இடத்தில் பிரச்சனை வர, கடன் வாங்கி சொந்தமாக கார் வாங்கி அதனை டேக்ஸியாக பயன்படுத்தி தனது வாழ்க்கையைத் தொடங்குகிறார்.
இரு சக்கர வாகனத்தில் வரும் நபர் கிஷோர் மீது மோதிவிட, கிஷோரின் காலில் அடிபட்டு விடுகிறது. இந்த சூழலில், வீடியோ ஒன்று சமூக வலைதளங்களில் பிரபலமாக, அந்த வழக்கில் கிஷோர் மீது வழக்கு போட்டு அவரை சிறையில் அடைக்கிறது காவல்துறை.
அவர் மீது கொலைபழி போட்டு, தண்டனைப் பெற்றுத் தர மேலிடத்திலிருந்து அழுத்தம் வரவே, அடுத்தடுத்து கதை சுவாரஸ்யம் எடுக்கிறது. இந்த சூழலில், தான் காதலிக்கும் பெண்ணின் அண்ணன் தான் கிஷோர் என்று அறிகிறார் டிடி எஃப் வாசன், அவருக்கு உதவி செய்ய களத்தில் இறங்குகிறார் டிடிஎஃப் வாசன்.
இறுதியில் கிஷோரை இந்த வழக்கில் இருந்து டிடிஎஃப் வாசன் காப்பாற்றினாரா? இல்லையா? என்பதே படத்தின் மீதிக் கதை.
கிஷோரின் நடிப்பில் அனுபவம் தெரிகிறது. படத்தின் முக்கிய கதாபாத்திரத்தை தோளில் சுமக்கிறார். போலீஸ் ஸ்டேஷனில் அடி வாங்கும் காட்சியில் ஒரு நிமிடம் விசாரணை படத்தின் காட்சிகளை கண் முன் கொண்டு வந்து விட்டார்.
கதாபாத்திரத்தை மீறி ஓவர் ஆக்டிங் கொஞ்சம் அதிகமாகவே எட்டிப் பார்த்தது டி டி எஃப் வாசனிடம். கதாபாத்திரத்திற்கு தேவையான நடிப்பை அளவாக கொடுத்திருக்கலாம். ஆனால், இதற்கு பிறகாவது அதை பின்பற்றுவார் என்று நம்பலாம்.
ஹரீஷ் பெராடி வில்லத்தனத்தில் மிரட்டியிருக்கிறார். ஜான் விஜய் ஒவ்வொரு படத்திலேயும் ஒரே மாதிரியான பாடி லாங்குவேஜ், குரல் என சலிப்படைய செய்கிறார். அதிலும் இந்த படத்தில் இன்னும் சற்று அதிகமாகவே வெறுப்படைய செய்திருக்கிறார். இனி வரும் படங்களில் சரி செய்யுங்கள் ஜான் விஜய் சார்.
சிறைக்குள் நடக்கும் படுகொலை சம்பவத்தைமையப்படுத்தி படத்தை இயக்கியிருக்கிறார் இயக்குனர். படம் யதார்த்தமாக இருக்க வேண்டும் என்பதற்காக காட்சிகளில் இந்த அளவுக்கு கொடூரத்தையும், வன்முறையும் எடுக்க வேண்டுமா? கொஞ்சம் தவிர்த்து குறைத்திருக்கலாம்.
மற்ற நடிகர்களிடம் நடிப்பை அளவாக வாங்கியிருக்கிறார் இயக்குனர். பின்னணி இசை படத்திற்கு கைகொடுத்திருக்கிறது.
இயக்கம்: கருணாநிதி
நடிகர்கள்: கிஷோர், டி டி எஃப் வாசன், அபிராமி, குஷிதா, நரேன், திலீபன் ஜான் விஜய், போஸ் வெங்கட், ஹரிஷ் பெராடி, சிங்கம் புலி
இசை: அஸ்வின் விநாயகமூர்த்தி
ஒளிப்பதிவு: எஸ் பிச்சுமணி
தயாரிப்பு: ஜி ஆர் மதன் கிருஷ்ணன்
ஐ பி எல் – சட்டத்திற்கு இன்னும் கொஞ்சம் கவனம் தேவை
