தொழில்நுட்பமும் மாயமும் கைகோர்க்கும் வித்தியாசமான அனுபவம்!
சினிமாவில் பேய் என்றாலே இருட்டு, அலறல், திடீர் அதிர்ச்சி எனப் பழகிப்போன வழக்கத்திலிருந்து விலகி, கற்பனைக்கும் நகைச்சுவைக்கும் மர்மத்துக்கும் இடமளித்திருக்கிறது ட்ரோன்ஸ் திரைப்படம்.
கதையைச் சொல்லும் விதத்தில் இருக்கும் புதுமையே இப்படத்தின் முக்கியமான பலம். அறிவியல் சார்ந்த சிந்தனைகளையும் இயற்கைக்கு அப்பாற்பட்ட நிகழ்வுகளையும் ஒரே திரைக்கதைக்குள் இணைக்க முயன்றிருக்கும் இயக்குநர் ராகவ் மிர்தாத், வழக்கமான பேய்ப் பட அனுபவத்திலிருந்து ரசிகர்களை வேறொரு உலகத்துக்கு அழைத்துச் செல்கிறார்.
கல்லூரியிலிருந்து இடைநீக்கம் செய்யப்பட்ட மாணவர்கள், விஞ்ஞானியின் வீடு, ஒரு சிறிய ட்ரோன், மர்மமான பெண், பொம்மைகளுடன் தொடர்புடைய அமானுஷ்யம் என ஒன்றுக்கொன்று தொடர்பில்லாதவை போலத் தோன்றும் அம்சங்கள் கதையில் அறிமுகமாகின்றன.
ஆரம்பத்தில் பல்வேறு நிகழ்வுகள் தனித்தனியாக நகர்வது போன்ற உணர்வு ஏற்பட்டாலும், அவற்றை ஒரே கதைக்குள் கொண்டுவரும் முயற்சி கவனிக்க வைக்கிறது. நகைச்சுவைக்கும் மர்மத்துக்கும் இடையே சமநிலையை உருவாக்க இயக்குநர் எடுத்திருக்கும் முயற்சி பாராட்டுக்குரியது.
குறிப்பாக, காதல், பயம், அறிவியல் கற்பனை ஆகியவற்றை வழக்கமான பாணியில் அணுகாமல், சற்றே வினோதமான கற்பனையுடன் காட்சிப்படுத்தியிருப்பது படத்துக்குத் தனித்த அடையாளத்தைத் தருகிறது.
டிராவிட் செல்வம், சித்தி இத்னானி, அஞ்சலி நாயர், தேவதர்ஷினி உள்ளிட்ட நடிகர்கள் தங்களுக்குக் கொடுக்கப்பட்ட கதாபாத்திரங்களுக்கு ஏற்ற பங்களிப்பை வழங்கியிருக்கிறார்கள்.
அஞ்சலி நாயரின் நடிப்பில் வெளிப்படும் இயல்பும், தேவதர்ஷினியின் கதாபாத்திரம் உருவாக்கும் மர்ம உணர்வும் படத்தின் சுவாரசியத்துக்கு உதவுகின்றன. நகைச்சுவைக் காட்சிகளில் வரும் நடிகர்களின் பங்களிப்பும் குடும்பத்துடன் ரசிக்கக்கூடிய தருணங்களை உருவாக்குகிறது.
ஜெயந்த் சேது மாதவனின் ஒளிப்பதிவு, படத்தின் கற்பனை உலகத்துக்குத் தேவையான காட்சியமைப்பை வழங்குகிறது. ஹரி எஸ்.ஆரின் இசை, கதையின் சூழலுக்கு ஏற்ப துணைபுரிகிறது. சதீஷ் சூர்யாவின் படத்தொகுப்பு, பல்வேறு அம்சங்களைக் கொண்ட கதையை ஒருங்கிணைக்கிறது.
படத்தின் தொடக்கப் பகுதியில் பல கதாபாத்திரங்களும் சம்பவங்களும் அறிமுகமாவதால், கதை சீராக நகர்வதற்குச் சற்று நேரம் தேவைப்படுகிறது. சில நகைச்சுவைக் காட்சிகள் அனைவருக்கும் ஒரே அளவில் ஈர்ப்பை ஏற்படுத்தாமல் போகலாம்.
இருப்பினும், வழக்கமான திகில் படங்களின் பாதையில் பயணிக்காமல், தனக்கென ஒரு கற்பனை உலகத்தை உருவாக்க முயன்றிருப்பது படத்தின் குறிப்பிடத்தக்க அம்சம்.
ட்ரோன்ஸ் என்பது பயமுறுத்துவதை மட்டுமே நோக்கமாகக் கொண்ட திகில் படம் அல்ல; வித்தியாசமான கற்பனையையும் நகைச்சுவையையும் மர்மத்தையும் இணைத்துக் கொடுக்க முயலும் திரைப்படம்.
பழக்கமான பேய்க் கதைகளைப் பார்த்துச் சலித்தவர்களுக்கு, புதிய வகையான கற்பனை அனுபவத்தைத் தேடுபவர்களுக்கு இப்படம் ஒரு மாற்றுத் தேர்வாக அமையலாம்.
மொத்தத்தில், வழக்கமான பாதையைத் தவிர்த்து வித்தியாசமாகப் பறக்க முயற்சிக்கும் ட்ரோன்ஸ்!
மொத்தத்தில் அன்புக்காக கூட ஆண்களிடமோ மற்றவர்களிடமோ சார்ந்து இருக்க கூடாது. தன்னை தானே காதலிப்பது தான் பெண்ணியம் என்ற ஆழமான கருத்தை பதிவு செய்திருக்கிறது.
