பரோட்டா முருகேசனின் மகன் சிறுவயதில் கிணற்றில் தவறி விழுந்து உயிருக்கு போராடுகிறார். ஆட்டுக்குட்டி ஒன்றை பிடித்துக் கொண்டு ஒண்டிமுனியா இந்த ஆட்டை உனக்கு பலி கொடுக்கிறேன் என் மகனின் உயிரை திரும்பிக் கொடு என்றதும் மகன் கண் விழிக்கிறார்.
அன்று முதல் அந்த ஆட்டுக்குட்டியை கண்ணும் கருத்துமாக வளர்த்து வருகிறார் முருகேசன். ஒண்டி முனிக்காக அந்த ஆடு வளர்க்கப்படுவது அந்த கிராமத்திற்கே தெரியும்.
வருடங்கள்கடக்க, ஆட்டை ஒண்டிமுனிக்கு பலி கொடுக்க நினைக்கிறார் முருகேசன். பண்ணாடி (பண்ணையார்) இருவருக்குள் இருக்கும் சண்டையால் ஒண்டிமுனியை கிராம மக்கள் வழிபட விடாதபடி இருவரும் செய்து வைத்திருக்கின்றனர்.
இரு பண்ணாடியிடமும், முருகேசன் பேச்சுவார்த்தை நடத்திப் பார்க்கிறார். ஆனால், அதில் எந்த பயனும் இல்லை.
இரு பண்ணாடிகளில் ஒருவராக வரும் கார்த்திகேசன், ஒரு திட்டம் தீட்டுகிறார். அதற்காக ஒண்டிமுனியை வழிபட சம்மதிக்கிறார்.
அந்த திட்டம் என்ன? முருகேசனின் நீண்ட வருட கனவான ஆட்டை ஒண்டிமுனிக்கு பலி கொடுக்க முடிந்ததா இல்லையா? என்பதே படத்தின் மீதிக் கதை.
படத்தின் ஒட்டுமொத்த கதையையும் தன் தோள் மீது சுமந்திருக்கிறார் பரோட்டா முருகேசன். கிராமத்து வாழ்வியலை நம் கண்முன்னே அப்படியே கொண்டு வந்துவிட்டார் முருகேசன். கிடா மீது வைத்திருக்கும் பாசத்தை, அவர் அதனை தேடும் போது வெளிப்படுகிறது. ஒண்டிமுனி மீது வைத்திருக்கும் பக்தி, தனது குடும்பத்தின் மீது வைத்திருக்கும் அன்பு என கண்களாலே பல காட்சிகளை நகர்த்தச் சென்று, நம் கண்களுக்கு விருந்து வைத்திருக்கிறார் முருகேசன்.
படத்தில் மகளாக நடித்த சித்ரா நடராஜன், மருமகனாக நடித்திருந்த சேனாபதி, முருகன், பண்ணாடியாக நடித்திருந்த கார்த்திகேசன், விஜயன் மற்றும் விகடன் உள்ளிட்ட அனைவருமே படத்தின் கதாபாத்திரங்களாகவே வாழ்ந்திருக்கிறார்கள். கதாநாயகியின் கருத்தையும், கதாநாயகனின் காட்சிகளையும் சற்று கவனித்து தவிர்த்திருந்திருக்கலாம்.
பரோட்டா முருகேசனின் கதாபாத்திரத்தை பலப்படுத்தியது போல இயக்குனர் ஹீரோ மற்றும் ஹீரோயினியின் கதாபாத்திரத்தையும் வலுப்படுத்தியிருந்திருக்கலாம்.
ஒளிப்பதிவு தெளிவாக நேர்த்தியாக இருந்தது. பின்னணி இசையில் கதையோடு நம்மையும் சேர்ந்து பயணிக்க வைத்துவிட்டார்கள்.
விவசாயிகள் நடந்து கொண்டே, பல வருட அரசியலைப் பற்றி பேசும் காட்சி காட்சிக்கு சபாஷ்.
இயக்கம்: சுகவனம்
நடிகர்கள்: பரோட்டா முருகேசன், கார்த்திகேசன், சித்ரா நடராஜன், முருகன், சேனாபதி, விஜயன், விகடன்.
ஒளிப்பதிவு: விமல்
இசை: என் டி ஆர் (நடராஜன் சங்கரன்)
தயாரிப்பு: கருப்பசாமி
இணைத் தயாரிப்பு: அமராவதி
ஒண்டிமுனியும் நல்லபாடனும் – இயற்கையோடு இணைந்த வாழ்வியல் பயணம்
