டேனியல் பாலாஜி காசிமேடு பகுதியில் மிகப்பெரும் ரெளடியாக வலம் வருகிறார். காசிமேடு அர்னால்டு என்றால் அனைவருமே பயப்படும் அளவிற்கு ரத்தம் தெறிக்க ஒரு ரெளடியாக இருந்து வருகிறார். பெரிய ரெளடி என்றாலும், தனது குருநாதர் பாக்யராஜிடம் பணிவாகவும் அன்பாகவும் இருந்து வருகிறார்.
இந்நிலையில், விபத்து ஒன்றில் பாசமாக வளர்த்த தனது மகளை இழந்து விடுகிறார் பாக்யராஜ். இதனால் பதறித் துடிக்கும் பாக்யராஜ், தனது மகளை போஸ்ட்மார்டம் செய்யாமல் அப்படியே கொடுத்துவிடுங்கள் என்று அரசு மருத்துவராக வரும் தன்யாவிடம் கெஞ்சுகிறார்.
ஆனால், சட்டப்படி என்ன செய்ய வேண்டுமோ அதை தான் செய்யப்போகிறேன். கண்டிப்பாக போஸ்ட் மார்டம் செய்து தான் தருவேன் என்று கூறி விடுகிறார் தன்யா. இதனை கேள்விபட்ட டேனியல் பாலாஜி, தன்யாவை போனில் கொலை மிரட்டல் விடுக்கிறார்.
இந்த மிரட்டலை எல்லாம் துளியளவும் மதிக்காத தன்யா, டேனியல் பாலாஜியை எதிர்கொண்டு, போஸ்ட்மார்டம் செய்து விடுகிறார்.
இதனால், டேனியல் பாலாஜியின் நேரடி பகையை சம்பாதித்துக் கொள்கிறார். இறுதியில், டேனியல் பாலாஜி என்ன செய்தார் என்பதே படத்தின் மீதிக் கதை.
படத்தின் ஹீரோவும் இவரே வில்லனும் இவரே என்று கூறும் அளவிற்கு ஒட்டுமொத்த படத்தையும் தனதாக்கிக் கொண்டு படம் முழுவதிலுமே ஜொலித்திருக்கிறர் டேனியல் பாலாஜி.
படம் ஆரம்பித்ததுமே கதைக்குள் சென்று விட்டதால், படத்திற்குள் நம்மையும் சேர்த்து இழுத்து உள்ளேச் செல்ல வைத்துவிட்டார் இயக்குனர். டேனியல் பாலாஜிக்கென்று மாஸ் காட்சிகள் படம் முழுவதுமே எட்டிப் பார்த்தது. ஒரு வில்லனாக தனது பார்வையிலும் உடல் மொழியிலும் மிரட்டலான நடிப்பையும் கொடுத்து அனைவரையும் ஆச்சர்யப்படுத்தி விட்டார் டேனியல் பாலாஜி. இப்படத்தின் வெற்றியின் வாயிலாக அவரது ஆன்மா மகிழ்ச்சியடையட்டும்.
எதையும் துணிவோடு துணிந்து செய்யும் பழக்கம் கொண்ட தன்யா, தனது கதாபாத்திரத்தின் வலுவை நன்றாக புரிந்து கொண்டு அக்கதாபாத்திரமாக வாழ்ந்திருக்கிறார். கம்பீரமான தனது நடையிலும் பேச்சிலும் கதாபாத்திரத்தை நன்று புரிந்து நடித்திருக்கிறார்.
சில காட்சிகள் என்றாலும், வெயிட் காட்டிச் சென்று விட்டார் தமிழ். போலீஸ் ஸ்டேஷனில் மாஸ் காட்டிய காட்சிகள் மிரள வைத்தது.
தனது மகளின் உடலைப் பார்த்ததும் தந்தையாக தனது துக்கத்தை வெளிப்படுத்திய விதம், நிச்சயமாக பாக்யராஜை பாராட்டியே ஆக வேண்டும். படம் பார்த்த அனைவரையும் பாக்யராஜ் அந்த இடத்தில் அழ வைத்துவிட்டார்.
படம் ஆரம்பம் முதல் இறுதி வரை பரபரப்பாக கதையை கொண்டு சென்றிருந்தார் இயக்குனர். விருமாண்டி படத்தில் வரும் ஜெயிலை உடைக்கும் காட்சி போல், மருத்துவமனையில் ஒரு காட்சியை வைத்திருக்கிறார் இயக்குனர். அந்த காட்சியில் மிரட்டியிருக்கிறார்.
அதுமட்டுமல்லாமல், அடுத்து என்ன நடக்கும் என்ற எதிர்பார்ப்பை ஒவ்வொரு காட்சியிலும் வைத்து கதையை நகர்த்திக் கொண்டே சென்றிருக்கிறார். ஜிப்ரானின் பின்னணி இசை படத்திற்கு பெரிதாகவே கைகொடுத்திருக்கிறது.
ஒளிப்பதிவு காட்சிகளுக்கு உயிர் கொடுத்திருக்கிறது என்று தான் சொல்ல வேண்டும்.
இயக்கம்: JP
நடிகர்கள்: டேனியல் பாலாஜி, கே பாக்யராஜ், அருள் தாஸ், தன்யா ரவிச்சந்திரன், தமிழ், நயனா, ஸ்வேதா டாரதி, ஜேக் அருணாச்சலம், ரங்கா
தயாரிப்பு: பிரதிக் டி சாட்பார், அதுல் எம் போஸமியா,
இசை: ஜிப்ரான்
ஒளிப்பதிவு: ராமலிங்கம்
படத்தொகுப்பு: இளையராஜா சேகர்
B P 180 – செம ஸ்பீட்
